Psalms 104

1Dumisa uJehova, O mphefumulo wami. O Jehova Nkulunkulu wami, umkhulu kakhulu; ugqoke inkazimulo lobukhosi.

2Uyazigoqela ngokukhanya kungathi kungesivunulo; amazulu uyawelula njengethente

3anqumise izintungo zezindlu zangaphezulu zilale phezu kwamanzi. Wenza amayezi inqola yakhe yamabhiza, undiza ngezimpiko zomoya.

4Wenza izikhatha zomoya zibe yizigijimi zakhe, amalangabi omlilo izinceku zakhe.

5Wawugxilisa umhlaba ezisekelweni zawo; ungeke wagudlulwa.

6Wawembesa ngolwandle njengesivunulo; amanzi ema ngaphezu kwezintaba.

7Kodwa wathi ngokukhwaza amanzi abaleka, ngomsindo wokuduma kwakho asibathela;

8ageleza phezu kwezintaba, ehlela ezigodini endaweni owamisele kuyo.

9Wamisa umkhawulo angeke aweqe; kasayikubuya awugubuzele njalo umhlaba lanini.

10Wenza imithombo impompozele amanzi ezindongeni; ageleza phakathi kwezintaba,

11zipha amanzi kuzo zonke izinyamazana zeganga; labobabhemi beganga bacitsha lapho ukoma.

12Izinyoni zomoya zakhela eduze kwamanzi; ziyatshiloza phakathi kwezingatsha.

13Uyazithelezela izintaba esezindlini zakhe eziphezulu; umhlaba uyawusuthisa ngezithelo zomsebenzi wakhe.

14Umilisela izinkomo utshani, ahlanyelele abantu bona bahlakule kuzuzakale ukudla emhlabathini:

15iwayini elijabulisa inhliziyo yomuntu, amagcobo enza ubuso bakhe bukhazimule, lesinkwa esilulamisa inhliziyo yakhe.

16Izihlahla zikaJehova ziyathelelwa okwaneleyo, imisedari yeLebhanoni ayihlanyelayo.

17Izinyoni zakhela kuyo izidleke zazo; ingabuzane lakha indlu yalo ezihlahleni zephayini.

18Izintaba eziphakemeyo ngezamagogo, amawa ayisiphephelo sezimbila.

19Inyanga yehlukanisa izibanga zomnyaka, lelanga liyazi ukuthi litshona nini.

20Uletha umnyama, kube sebusuku, bese zonke izinyamazana zeganga zizingela.

21Izilwane ziyabhonga zifuna inyama yazo zidinga ukudla kwazo kuNkulunkulu.

22Ilanga liyaphuma, zibe sezicatsha; ziyabuyela ezikhundleni zazo zilale.

23Umuntu abe esephuma aye emsebenzini wakhe, ayotshikatshika kuze kube ntambama.

24Minengi kanganani imisebenzi yakho, O Jehova! Zonke wazenza ngenhlakanipho; umhlaba ugcwele izidalwa zakho.

25Nantuyana ulwandle, uthwaca olungakaya, olunyakazela ngezidalwa ezingelakubalwa – izinto eziphilayo ezinkulu lezincinyane.

26Kulapho imikhumbi endenda khona isiya le lale, loleviyathani, isilo owasenza ukuthi sidlale khona.

27Zonke lezi zikhangele kuwe ukuthi uziphe ukudla ngesikhathi esifaneleyo.

28Uthi ungazipha bese zikubuthela ndawonye; uthi ungavula isandla sakho, zisuthiswe ngezinto ezinhle.

29Uthi ungafihla ubuso bakho zitshaywe luvalo; uthi ungathatha umphefumulo wazo, zife zibuyele othulini.

30Uthi ungathumela uMoya wakho zidalwe, uwenze ube muhle umhlaba.

31Sengathi inkazimulo kaJehova ingema lanini; sengathi uJehova angathokoza ngemisebenzi yakhe –

32yena okhangela umhlaba uthuthumele, othinta izintaba zithunqe intuthu.

33Ngizahlabelela kuJehova impilo yami yonke; ngizahlabelela indumiso kuNkulunkulu wami lanini nxa ngisaphila.

34Sengathi iminakano yami ingamthokozisa, ngoba ngiyathokoza kuJehova.

35Kodwa sengathi izoni zinganyamalala emhlabeni lezigangi zingabe zisaba khona. Dumisa uJehova, O Mphefumulo wami. Dumisa uJehova.